चाडपर्व नजिकिएसँगै काठमाडौं महानगरपालिकाले बजार अनुगमन तीव्र पारेको छ
दशैं, तिहार र छठ पर्व नजिकिएसँगै काठमाडौं महानगरपालिकाले बजारमा हुने कालोबजारी, कृत्रिम मूल्यवृद्धि र गुणस्तरहीन वस्तुको बिक्री नियन्त्रण गर्न अनुगमनलाई तीव्रता दिएको छ। चाडपर्वका बेला उपभोक्ताको चाप बढ्ने भएकाले बजारमा निगरानी बढाइएको हो।
अनुगमनका क्रममा खाद्य वस्तुको गुणस्तर, म्याद सकिएको वा अखाद्य सामग्री, मूल्यसूची, नापतौल तथा बिलबिजकजस्ता विषयमा विशेष निगरानी गरिने जनाइएको छ। उपभोक्ता हित संरक्षणका लागि सम्बन्धित निकायसँग समन्वय गरेर अनुगमन तथा कारबाही अघि बढाइने बताइएको छ।
चाडपर्वको समयमा काठमाडौंका प्रमुख बजार क्षेत्रमा किनमेल गर्ने ग्राहकको चापसमेत बढिरहेको छ। भृकुटीमण्डप, असन, इन्द्रचोक, न्युरोडलगायतका क्षेत्रमा उपभोक्ताको आवागमन बढेसँगै व्यवसायीको गतिविधिमाथि निगरानी आवश्यक भएको अधिकारीहरूले बताएका छन्।
