२५ वर्ष पुरानो गीतलाई कोरोना महामारीले जगायो
कसैको मन रोए जस्तो
तुवालो झैँ जता ततै सब
आसुँले धोए जस्तो
काठमाडौँ । प्रगति देवकोटाले २५ वर्ष अगाडि लेखेको कविताको हरफ हो यो। आफूले स्कूल पढ्दा कोरेको यस गीतमा मानसिक तनाव, एक्लोपन र डर अभिव्यक्त गरेकी थिइन् उनले। कोरोना भाइरस महामारीपछि धेरैमा देखिन् उस्तै चिन्ता र भय। त्यसैले सन्दर्भ मिल्दो जुल्दो परिस्थितिमा थन्किएर रहेका ती शब्दहरूलाई दिइन् कलात्मक आकार र, बन्यो गीत हावामा फैलियो मधुरो गीत।
देवकोटाको शब्दमा संगीत भरे संगीतकार संजीव सिंहले। यसमा एलिना चौहानले स्वर दिएकी छिन् । गीत यसै साता भिडियोसहित युट्युब रिलिज भयो।
गीतमा महामारी काल भोगिरहेको व्यक्तिको मनोविज्ञान चित्रित छ। त्यो मनोविज्ञानलाई भिडियोमा छायाँमार्फत् प्रतीकात्मक ढङ्गमा देखाइएको छ। त्यो कालो छायाँले मूल पात्रलाई लखेटिरहेछ। जसरी कोरोना, संक्रमण,अभाव र मृत्युको भयले आम मानिसलाई लखेटिरहेछ।
भिडियोको निर्देशन कवि सुवेदी र पुजन सापकोटाले गरेका हुन्।
