.jpg)
उदयपुर सिमेन्ट कारखाना पूर्णरूपमा सञ्चालनमा आउँछ : अर्थमन्त्री महत
काठमाडौं । उदयपुर सिमेन्ट कारखाना देशकै लागि महत्वपूर्ण भएको अर्थमन्त्री डा. प्रकाशशरण महतले बताएका छन् । आज उद्योग र उद्योगले प्रयोगमा ल्याएको खानी निरीक्षण गर्दै मन्त्री डा.महतले यो महत्वपूर्ण उद्योग सञ्चालनमा आएको समस्या सबै मिलेर समाधान गर्नुपर्ने बताएका हुन् ।
सबैको सामूहिक प्रयासबाट मात्र उद्योग पुनः सञ्चालनको सम्भावना रहेको बताउँदै उनले विगतबाट पाठ सिकेर आफूलाई परिवर्तन गर्न आवश्यक रहेको बताए । ‘सरकारले अनुदान दिएर मात्र समाधान निस्कदैन । व्यवस्थापन सुध्रिनुपर्यो, श्रमिकले जिम्मेवारीबोध गर्नुपर्यो । कसले जिम्मेवारी बोध नगर्दा यो अवस्था सिर्जना भयो रु यसको हामी सबैले मूल्यांकन र विश्लेषण गरौं । विगतबाट पाठ सिकेर आफूलाई परिवर्तन गर्नुपर्छ ।’ उनले भने, ‘निजी क्षेत्रमा धेरै उद्योग व्यवसाय सञ्चालन हुन्छ । पाँच दर्जनभन्दा बढी निजी क्षेत्रको सिमेन्ट उद्योग छ । व्यवस्थापन र सरकारले ध्यान नदिएको श्रमिक साथीहरुबाट आयो’ उदयपुर सिमेन्ट कारखाना जापान सरकारको सहयोगमा ४४ करोड लगानी भएको उल्लेख गर्दै उनले अहिले पनि एक अर्ब रुपैयाँको साउब्याज केही नतिरेको बताए ।
उनले अगाडी भने, ‘सरकारले व्यवस्थापक नियुक्ति गर्यो, त्यहाँ पनि कमजोरी छ । व्यवसायिकतालाई हामीले महत्व दिएनौं । व्यवस्थापनको नेतृत्व पनि त्यस्तै । श्रमिकले पनि हाम्रो जिम्मेवारी भनेको त सुविधा माग गर्ने हो भन्ने मात्र ठाने । त्यसको साझा परिणाम उद्योगको अहिलेको अवस्था हो ।’ व्यवस्थापन र ट्रेड युनियनबाट प्रतिबद्धता आएन भने उद्योग बचाउन कठिन हुने उनको भनाई थियो ।
