सुन काण्डमा सत्ताधारी दलका उच्च तहका नेताहरु संग्लन छन् : योगेश भट्टराई
काठमाडौं, ३२ साउन । सुन काण्डमा सत्ताधारी दलका उच्च तहका नेताहरु संग्लन भएको नेकपा (एमाले) का सचिव योगेश भट्टराईले दाबी गरेका छन् । उच्च स्तरिय छानबिन समिती बनाएर अगाडि बढ्दा अर्थमन्त्रीदेखि गृहमन्त्री समेत बयानको भागीदार बन्ने भएकै कारणले छानबिन समिती नबनाएको उनको भनाई छ ।
उद्योग वाणिज्य महासंघ मधेश प्रदेशको प्रथम अधिबेशनमा सहभागी हुन महोत्तरी पुगेका सचिव भट्टराईले संसद अवरुद्ध आफुहरुको रहर नभएको पनि बताएका छन् । `एमालेले गरेको संसद बैठक अवरुद्धलाई लिएर धेरैले थुप्रै प्रश्न उठाएका छन्,´ उनले भने, `हाम्रो माग एउटै हो उच्च स्तरिय छानबिन समिती बनोस, निष्पक्ष छानबिन हाेस् ।´
उच्च स्तरिय छानविन समितीले गृहमन्त्रीलाई समेत नछोड्ने भएकाले प्रधानमन्त्री प्रचण्डले नै यसलाइ रोकेको सचिव भट्टराईको आरोप छ । २०७९ को निर्वाचनमा अपेक्षित परिणाम नआएको हुनाले देशमा अहिले भ्रष्टाचार र अपराधी गतिविधि बढेको जिकिर गर्दै भट्टराईले त्यसै कारणले पनि नेकपा एमालेले मिसन २०८४ बनाएको बताएका छन् । मिसन २०८४ निर्वाचन केन्द्रित भएको बताउदै उक्त निर्वाचनमा स्थानियदेखि संघसम्म एमालेको नै बहुमत हुने भट्टराईले जिकिर गरेका छन् ।
