वीर अस्पतालमा आजदेखि बिहान ८ बजेबाट नै ओपिडी सञ्चालन हुने
काठमाडौँ, १, साउन । वीर अस्पतालमा साउन १ गतेदेखि ओपिडी सेवा बिहान ८ देखि दिउँसो ४ बजेसम्म सञ्चालन हुने भएको छ।
चिकित्सा विज्ञान राष्ट्रिय प्रतिष्ठान (न्याम्स) ले असार २२ गते गरेको निर्णयअनुसार वीर अस्पतालमा बिहान ८ः०० बजेदेखि ओपिडी सेवा सञ्चालन गर्ने कार्यक्रम आजदेखि कार्यान्वयनमा आउन लागेको हो।
तर, न्याम्स अन्तर्गतका केही चिकित्सकले भने यो निर्णयप्रति आपत्ति जनाउँदै आएका छन्। न्याम्सका प्राध्यापकहरूको संस्था फ्याकल्टी डक्टर्स एसोसिएसन (एफडीए) ले विज्ञप्ति जारी गरेर यो निर्णयको विरोध गरेको हो ।
एफडीएले सबैजसो विभागहरूको बिहानको अडिट र क्लिनिकल कक्षाहरू बिहान ८ बजे नै सुरु हुने भएकाले सोही समयमा ओपिडी सुरु गर्दा कक्षाहरूमा असर पर्ने जनाएको छ।
एफडीएले न्याम्सको निर्णयप्रति असहमति जनाउँदै सच्याउन समेत आग्रह गरेको छ।
