मलेसियामा बन्धक १३ मध्ये ६ नेपाली भोलि स्वदेश फर्काइँदै
काठमाडौँ, २५, पुस । मलेसियामा बन्धक बनाइएका १३ जना नेपाली नागरिक मध्ये ६ जना मंगलबार स्वदेश फर्किने भएका छन् ।
नेपालबाट मलेसिया गएका नेपालीहरू समस्यामा परेको गुनासो प्राप्त भएपछि सोमबार प्रधानमन्त्री पुष्पकमल दाहाल ‘प्रचण्ड’ले बन्धक बनाइएका र समस्यामा परेका अन्य नेपालीको अवस्था बुझी तत्काल उद्धार र पहल गर्न मुख्यसचिव शंकरदास बैरागीलाई निर्देशन दिएका थिए ।
त्यही निर्देशनका आधारमा सरकारले परराष्ट्र मन्त्रालयमार्फत मलेसियास्थित नेपाली राजदूतावाससँग सम्पर्क गरेको थियो ।
बन्धक बनाइएका नेपालीहरूको अवस्था बुझेर तत्काल उद्धारका लागि पहल पछि मलेसियाको पीआरएस फोरेस्ट म्यानेजमेन्ट कम्पनीमा कार्यरत १३ नेपाली नागरिक स्वदेश फर्किने भएका हुन् । ती मध्ये ६ जना मंगलबार स्वदेश फर्कदैछन् ।
मलेसियास्थित नेपाली राजदूतावासले प्रधानमन्त्री कार्यालयलाई दिएको जानकारीअनुसार उक्त कम्पनीमा काम गर्न गएका सबै १३ श्रमिकलाई म्यानपावर कम्पनीले खर्च व्यहोर्ने गरी नेपाली होटलमा खाने र बस्ने व्यवस्था गरिएको छ ।
दूतावासको पहलमा उनीहरूमध्ये ६ जना मंगलबार र १३ जनवरीमा अरु ७ जना नेपाल फर्किने भएका छन् । यसैगरी मलेसियाका एक अन्य कम्पनीमा समस्यामा परेका २८ जना नेपाली श्रमिकहरूको समस्या हल गर्नसमेत पहल भइरहेको छ ।
