जिल्लाव्यापी भलिबल प्रतियोगिता : खानीखोला, पनौती, महाभारत र बेथानचोक टिम विजयी
काठमाडौँ, ३, कात्तिक ।काभ्रे जिल्लाको पनौती नगरपालिका २, धाराचौरमा जारी जिल्लाव्यापी पालिकास्तरीय भलिबल प्रतियोगिता अन्तर्गत बुधबार लिग चरणका चार खेल सम्पन्न भएका छन्।
हिजो भएका खेलमा खानीखोला गाउँपालिका, पनौती नगरपालिका, महाभारत गाउँपालिका र बेथानचोक गाउँपालिकाका टिम विजयी भएका छन्।
लिगको पहिलो प्रतिस्पर्धात्मक खेलमा खानीखेलाले मण्डन देउपुर नगरपालिकालाई २५-१४, १९-२५ र २५-२३ ले पराजित गरेको हो ।
यस्तै, दोस्रो खेलमा भने पनौती नगरपालिकाले बाजी मार्न सफल भएको छ । पनौतीले बनेपा नगरपालिकालाई २५-२३ र २५-२० ले पराजित गर्यो।
त्यसैगरी, महाभारत गाउँपालिकाले पनौती नगरपालिका २ लाई २५-१४ र २९-२७ अंकले पराजित गर्यो भने चौथो खेलमा बेथानचोकले २५-१६ र २५-२२ को स्कोरले धुलिखेल नगरपालिकाको न्यु गौखुरेश्वर युवा क्लबलाई हराएको थियो।
बिहीबार आजको खेलका विजेता र उपविजेताबीच खेल हुनेछ।
पनौती नगरपालिकाको आयोजना, कुशादेवी युवा क्लब र लप्सेटार युवा समूहको समन्वयमा सञ्चालित प्रतियोगिता आगामी ५ गतेसम्म चल्नेछ।
