अमेरिका भ्रमणको एजेन्डा जानकारी गराउन प्रधानमन्त्रीलाई निर्देशन
काठमाडौँ, ५, असार । प्रतिनिधिसभाअन्तर्गतको अन्तर्राष्ट्रिय सम्बन्ध समितिले प्रधानमन्त्री शेरबहादुर देउवालाई उनको आसन्न अमेरिका भ्रमणबारे जानकारी गराउन निर्देशन दिएको छ ।
आज सिंहदरबारस्थित समितिको सभाकक्षमा बसेको बैठकले भ्रमणको मिति तय भएपछि एजेन्डाबारे जानकारी गराउन निर्देशन दिएको हो । समितिले आज प्रधानमन्त्री देउवालाई छलफलका लागि बैठकमा बोलाएको थियो । तर, उनी उपस्थित भएनन् ।
बैठकमा प्रधानमन्त्री अनुपस्थित भएकामा समितिको ध्यानाकर्षण भएको जनाइएको छ । रक्षामन्त्री समेत रहेका प्रधानमन्त्रीलाई स्टेट पार्टनरसिप प्रोग्राम (एसपीपी), परराष्ट्र नीति कार्यान्वयन, अमेरिका भ्रमणबारे जानकारी दिन औपचारिक पत्रसहित समितिमा आउन आमन्त्रण गरिएको थियो । तर, आफू नआउने र प्रतिनिधि समेत नपठाएको भन्दै समिति सभापतिसहित सांसदहरूले दुःख व्यक्त गरे ।
बैठकले दुई वर्षदेखि नबुझाएको समितिको प्रतिवेदन परिमार्जनसहित पारित गर्ने निर्णय गरेको समिति सभापति पवित्रादेवी निरौलाले जानकारी दिइन् ।
समितिले गएको शुक्रबार नेपाली सेना र रक्षा मन्त्रालयलाई एसपीपीसम्बन्धी सम्पूर्ण कागजात सात दिनभित्र बुझाउन निर्देशन दिएको थियो । ती कागजात आएपछि प्रधानमन्त्रीसहित छलफलमा बस्ने सभापति निरौलाले बताइन् ।
